डाछीमा ईभी माइक्रोको ठक्करबाट पैदलयात्रीको मृत्यु, स्थानीयद्वारा सडक अवरुद्ध

काठमाडौं, २८ साउन
काठमाडौंको कागेश्वरी मनोहरा नगरपालिका–४ डाछीस्थित बाघधारा नजिक ईभी माइक्रोको ठक्करबाट एक पैदलयात्रीको मृत्यु भएको छ।
बा.प्र.०१–००२ ज ९५८८ नम्बरको ईभी माइक्रोको ठक्करबाट स्थानीय ७० वर्षीय शंकरप्रसाद कुइँकेल गम्भीर घाइते भएका थिए। उनको उपचारका क्रममा शंखरापुर अस्पताल, नारायणटारमा मृत्यु भएको प्रहरीले जनाएको छ।
दुर्घटनापछि प्रहरीले माइक्रो र चालकलाई नियन्त्रणमा लिएको छ। घटनाको विरोधमा मृतकका आफन्तसहित करिब २०० जना स्थानीय डाछी चोकमा भेला भई सडक अवरुद्ध गरेका छन्।
प्रहरीका अनुसार घटनाबारे थप अनुसन्धान भइरहेको छ।