पर्सामा खेतमा लुकाइ राखिएको करिब एक सय किलो गाँजा बरामद

वीरगञ्ज , ३१ जेठ
पर्साको जगरनाथपुर गाउँपालिका–३ मुरैयाचोक क्षेत्रबाट प्रहरीले करिब एक सय किलोग्राम गाँजा बरामद गरेको छ।

जिल्ला प्रहरी कार्यालय पर्साका अनुसार आइतबार सशस्त्र प्रहरी बल र नेपाल प्रहरीको संयुक्त टोलीले खेतमा लुकाइ राखिएको अवस्थामा पाँच बोरामा रहेको गाँजा फेला पारी नियन्त्रणमा लिएको हो।

जिल्ला प्रहरी कार्यालय पर्साका सूचना अधिकारी डीएसपी हरिबहादुर बस्नेतले बरामद गाँजालाई नियन्त्रणमा लिएर आवश्यक अनुसन्धान सुरु गरिएको जानकारी दिए। उनका अनुसार गाँजा कसले लुकाएर राखेको हो भन्ने विषय अझै खुल्न नसकेको र संलग्न व्यक्तिको खोजी कार्य तीव्र रूपमा अघि बढाइएको छ।

प्रहरीले घटनाबारे थप अनुसन्धान जारी रहेको जनाएको छ। बरामद गाँजाको स्रोत तथा यसमा संलग्न व्यक्तिहरूको पहिचानका लागि अनुसन्धानलाई तीव्र बनाइएको प्रहरीको भनाइ छ।

लागुऔषध नियन्त्रण तथा अवैध कारोबार रोकथामका लागि सुरक्षा निकायले नियमित निगरानी र विशेष अभियान सञ्चालन गर्दै आएको जनाएको छ।