सेवाग्राहीमाथि कुटपिट आरोपमा यातायात व्यवस्था कार्यालय बाराका निमित्त प्रमुख पक्राउ
वीरगञ्ज, २३ असार
सेवाग्राहीमाथि कार्यालय परिसरमै कुटपिट गरेको आरोपमा यातायात व्यवस्था कार्यालय बारा, कलैयाका निमित्त कार्यालय प्रमुख चिन्तन आचार्य पक्राउ परेका छन्।
कार्यालय परिसरमा एक सेवाग्राहीमाथि कुटपिट गरिएको भिडिओ सामाजिक सञ्जालमा भाइरल भएपछि जिल्ला प्रहरी कार्यालय बाराले आचार्यलाई नियन्त्रणमा लिएर घटनाबारे अनुसन्धान सुरु गरेको हो।
जिल्ला प्रहरी कार्यालय बाराका प्रमुख एसपी नरेन्द्र कुँवरका अनुसार भिडिओ सार्वजनिक भएपछि घटनाको वास्तविकता बुझ्न आचार्यलाई नियन्त्रणमा लिइएको हो। घटनामा संलग्न अन्य पक्षसँग पनि आवश्यक सोधपुछ भइरहेको प्रहरीले जनाएको छ।
प्रहरीका अनुसार कार्यालय प्रमुखको कार्यकक्ष बाहिर एक सेवाग्राहीसँग विवाद चर्किएपछि दुवै पक्षबीच हातपात भएको थियो। सार्वजनिक भएको भिडिओ गत मार्च १७, २०२६ (फागुनको तेस्रो साता) को रहेको बताइएको छ।
यता, आचार्यले घटनामा संलग्न सेवाग्राही अरुण कुशवाहा रहेको दाबी गरेका छन्। उनका अनुसार कुशवाहाले आफू पत्रकार भएको परिचय दिँदै श्रीमती र सालीको सवारी चालक अनुमतिपत्र (लाइसेन्स) सम्बन्धी कामका लागि कार्यालय आएका थिए।
आचार्यले कुशवाहाले कार्यालयका कर्मचारीसँग गालीगलौज र धाकधम्की गरेपछि विवाद सिर्जना भएको र त्यसक्रममा हातपात भएको दाबी गरेका छन्।
यातायात व्यवस्था कार्यालय बारा परिसरमा कार्यालय प्रमुख तथा कर्मचारीहरूले सेवाग्राहीमाथि कुटपिट गरेको भिडिओ सार्वजनिक भएपछि भौतिक पूर्वाधार तथा यातायात मन्त्रालयले पनि घटनाप्रति चासो देखाएको छ।
प्रारम्भिक रूपमा घटनाकै दिन विवाद मिलाइएको बताइए पनि भिडिओ गत शनिबार सामाजिक सञ्जालमा सार्वजनिक भएपछि प्रहरीले अनुसन्धान प्रक्रिया अघि बढाएको जनाएको छ।
यो समाचार पढेर तपाईंलाई कस्तो अनुभूति भयो ?
