दुई होटलमा प्रहरीको छापा, ५ महिलासहित ८ जना नियन्त्रणमा

वीरगन्ज, १९ भदौ।
वीरगन्ज महानगरपालिका–१६ भन्सार क्षेत्रका दुई होटलमा प्रहरीले छापा मारेर ५ महिलासहित ८ जनालाई नियन्त्रणमा लिएको छ।
अनैतिक गतिविधि भइरहेको विशेष सूचनाका आधारमा बुधबार दिउँसो वडा प्रहरी कार्यालय वीर्ताबाट प्रहरी निरीक्षक विक्रम सुवेदीको नेतृत्वमा खटिएको टोलीले ‘अभिषेक होटल’ र ‘बेदामी होटल’मा छापा मारेको हो।
प्रहरीका अनुसार नियन्त्रणमा लिइएकामध्ये दुई भारतीय महिला र दुई भारतीय पुरुष रहेका छन्। बाँकी चार जनाको परिचय भने प्रहरीले खुलाएको छैन।
नियन्त्रणमा लिइएका सबैमाथि आवश्यक सोधपुछ तथा अनुसन्धान भइरहेको प्रहरीले जनाएको छ।