दुर्लभ खग्रास सूर्यग्रहण आज, नेपालबाट भने देखिँदैन

काठमाडौँ, २७ साउन
आज दुर्लभ खग्रास सूर्यग्रहण लाग्दैछ। तर यो खगोलीय घटना नेपालसहित एसियाका अधिकांश भागबाट भने देखिने छैन।
नासाका अनुसार सन् १९९९ पछि मुख्य भूमि युरोपबाट देखिने यो पहिलो पूर्ण सूर्यग्रहण हो। यसको पूर्ण स्वरूप ग्रिनल्यान्ड, आइसल्यान्ड, उत्तरी रुस, आन्ध्र महासागर तथा स्पेन र पोर्चुगलका केही भू–भागबाट देखिनेछ। पूर्ण खग्रास ग्रहणको मार्गमा करिब एक करोड ५० लाख मानिस पर्ने अनुमान गरिएको छ।
उत्तरी गोलार्धका अन्य धेरै स्थानबाट भने आंशिक सूर्यग्रहण देखिनेछ। त्यहाँ सूर्यको केही भाग चन्द्रमाले ढाकेको दृश्य अवलोकन गर्न सकिनेछ। पूर्ण ग्रहणको चरणमा चन्द्रमाले सूर्यको उज्यालो भागलाई पूर्ण रूपमा ढाक्नेछ।
नासाका अनुसार उत्तरी अमेरिकामा ग्रहण बिहानदेखि दिउँसोसम्म देखिनेछ भने युरोप र अफ्रिकामा बेलुकातिर देखिनेछ। पूर्ण खग्रासको अवधि सामान्यतः दुई मिनेटभन्दा कम हुने अनुमान गरिएको छ, यद्यपि केही स्थानमा यो अवधि दुई मिनेटभन्दा केही बढी हुन सक्नेछ।
क्याप्सन: नेपालबाट नदेखिने दुर्लभ खग्रास सूर्यग्रहण आज विश्वका विभिन्न भू–भागबाट अवलोकन गरिँदैछ। पूर्ण ग्रहणको मार्गमा पर्ने क्षेत्रमा चन्द्रमाले सूर्यलाई पूर्ण रूपमा ढाकेको अद्भुत दृश्य देखिनेछ।