रास्वपा सांसद पन्तको उजुरीमा जनआस्थाका पत्रकार किशोर श्रेष्ठ फेरि पक्राउ

काठमाडौं, ३१ असोज
जनआस्था साप्ताहिकका प्रधान सम्पादक किशोर श्रेष्ठलाई प्रहरीले घरबाटै लगेको छ। श्रेष्ठले आफूलाई पक्राउ गरेलगत्तै साइबर ब्युरो लैजाने जानकारी दिइएको बताएका छन्।

बालेन सरकार गठन भएपछि श्रेष्ठ दोस्रोपटक प्रहरीको नियन्त्रणमा परेको यो घटनासँग सम्बन्धित विवरणमा उल्लेख छ। यद्यपि, प्रहरीले भने उनलाई नियन्त्रणमा लिएको नभई उजुरीका विषयमा छलफल गर्न दुवै पक्षलाई बोलाइएको जनाएको छ।

श्रेष्ठ प्रधान सम्पादक रहेको जनआस्था साप्ताहिकले पन्तको परिवारमाथि धादिङको थाक्रे गाउँपालिका–१० का तिलकप्रसाद बिडारीको साढे चार रोपनी जग्गा हडपेको आरोपसम्बन्धी समाचार प्रकाशित गरेको थियो। उक्त समाचारविरुद्ध पन्तले साइबर ब्युरोमा उजुरी दिएका थिए।

पन्तले उजुरी दिएपछि सामाजिक सञ्जालमा आफूविरुद्ध गरिएका टिप्पणीलाई लिएर श्रेष्ठले पनि जाहेरी दिएको विवरणमा उल्लेख छ।

साइबर ब्युरेका प्रहरी उपरीक्षक दीपकराज अवस्थीले दुवै पक्षलाई उजुरीका विषयमा छलफल गर्न बोलाइएको बताएका छन्। उनका अनुसार प्रहरीकहाँ निवेदन दिएका दुवै पक्षलाई छलफलका लागि बोलाइएको हो, नियन्त्रणमा लिइएको होइन।

यसअघि गत २७ साउनमा पनि समाचारकै विषयलाई लिएर प्रहरीले श्रेष्ठलाई पक्राउ गरेको थियो। त्यसक्रममा उनको घर र कार्यालयमा समेत खानतलासी गरिएको थियो। पछि सर्वोच्च अदालतको आदेशमा उनी हिरासतमुक्त भएका थिए।