सार्वजनिक बसमा महिला यात्रुमाथि हातपात तथा अभद्र व्यवहार गरेको आरोपमा तीन जना पक्राउ
कञ्चनपुर, २० कार्तिक
सार्वजनिक यातायातमा सवार महिला यात्रुमाथि हातपात तथा अभद्र व्यवहार गरेको आरोपमा कञ्चनपुर प्रहरीले तीन जनालाई पक्राउ गरेको छ ।
जिल्ला प्रहरी कार्यालय कञ्चनपुरका अनुसार गत कार्तिक १७ गते काठमाडौंबाट महेन्द्रनगर आउँदै गरेको सुदूरपश्चिम प्रदेश ०२-००१ ख २१६३ नम्बरको रात्रिबसमा सवार एक महिला यात्रुमाथि तीन जनाले हातपात तथा अभद्र व्यवहार गरेको घटना सार्वजनिक भएको हो ।
उक्त घटनामा संलग्न रहेको आरोपमा प्रहरीले कार्तिक १९ गते तीन जनालाई पक्राउ गरेको जिल्ला प्रहरी कार्यालय कञ्चनपुरले जनाएको छ ।
पक्राउ पर्नेमा भीमदत्त नगरपालिका–१ भाँसी निवासी २१ वर्षीय शम्भु विष्ट, २४ वर्षीय अनिल नाथ र भीमदत्त नगरपालिका–३ तिलकपुर निवासी २१ वर्षीय जीवन बम रहेका छन् ।
प्रहरीले पक्राउ परेका तीनै जनालाई जिल्ला प्रहरी कार्यालयमा राखेर घटनाबारे आवश्यक अनुसन्धान गरिरहेको जनाएको छ ।
जिल्ला प्रहरी कार्यालय कञ्चनपुरका सूचना अधिकारी प्रहरी नायब उपरीक्षक टेकबहादुर रावतले प्रेस विज्ञप्तिमार्फत घटनाबारे जानकारी दिएका हुन् ।
यो समाचार पढेर तपाईंलाई कस्तो अनुभूति भयो ?
