स्रोत नखुलेको २ लाख ९ हजार ५ सय भारतीय रुपैयाँसहित दुई जना पक्राउ

वीरगञ्ज, १७ साउन
पर्सा प्रहरीले स्रोत नखुलेको प्रतिबन्धित भारतीय रुपैयाँसहित दुई जनालाई पक्राउ गरेको छ।

जगरनाथपुर गाउँपालिका–२ स्थित नहर सडकखण्डमा इलाका प्रहरी कार्यालय जानकीटोलाको टोलीले विशेष सूचनाका आधारमा शनिबार ना.१० प ४४६९ नम्बरको मोटरसाइकल जाँच गर्ने क्रममा उनीहरूलाई नियन्त्रणमा लिएको हो।

पक्राउ पर्नेमा मकवानपुरको राक्सिराङ गाउँपालिका–२ घर भई हाल चितवनको माडी नगरपालिका–९, हनुमानझुला बस्ने ४२ वर्षीय दिपेश हिमडुङ र सोही स्थानका २६ वर्षीय तिलक हिमडुङ रहेका छन्।

प्रहरीका अनुसार उनीहरूको साथबाट स्रोत नखुलेको प्रतिबन्धित भारतीय ५०० दरका ३१६ थान, २०० दरका ७५ थान र १०० दरका ३६५ थान गरी कुल २ लाख ९ हजार ५ सय भारतीय रुपैयाँ बरामद भएको छ।

बरामद रकम तथा मोटरसाइकलसहित पक्राउ परेका दुवै जनामाथि जिल्ला प्रहरी कार्यालय पर्साले थप अनुसन्धान अघि बढाएको जनाएको छ।