भोटेकोशी बाढीमा मृत्यु हुनेको संख्या १ हजार ४१० पुग्यो

काठमाडौं, ९ असोज
भोटेकोशीमा आएको विनाशकारी बाढीमा परी मृत्यु हुनेको संख्या १ हजार ४१० पुगेको छ। नेपाल प्रहरीका अनुसार विभिन्न प्रभावित जिल्लाबाट १ हजार ४१० जनाको शव फेला परेको हो।

फेला परेका शवमध्ये रसुवामा १९९, नुवाकोटमा २०३, धादिङमा ७२, चितवनमा ३६४, गोरखामा ७८, तनहुँमा ३८, नवलपरासी पूर्वमा २३२ र नवलपरासी पश्चिममा २२२ जनाको शव फेला परेको प्रहरीले जनाएको छ। हालसम्म १ हजार २४६ शव व्यवस्थापन गरिएको छ।

शव पहिचानका लागि मृतकका १ हजार २८६ र आफन्तका १ हजार ९९१ गरी ३ हजार २७७ वटा डीएनए नमुना संकलन गरिएको छ। पहिचान हुन नसकेका १ हजार ३६१ शवको विवरण प्रहरीले वेबसाइटमार्फत सार्वजनिक गरेको छ।

बाढी प्रभावित क्षेत्रमा उद्धार, खोजी, राहत वितरण तथा शव व्यवस्थापनका लागि ७ हजार ९७५ प्रहरी कर्मचारी परिचालन गरिएको छ। प्रहरीका अनुसार अझै ४ हजार ९० जना बेपत्ता छन्। उनीहरूको खोजी कार्य विभिन्न प्रभावित क्षेत्रमा जारी छ।

यसैगरी, विभिन्न जिल्लामा स्थापना गरिएका होल्डिङ सेन्टरमा २ हजार ३ जना व्यक्तिलाई राखिएको प्रहरीले जनाएको छ। प्रभावित क्षेत्रमा खोज तथा उद्धार, राहत वितरण र शव व्यवस्थापनको कामलाई निरन्तरता दिइएको छ।