वर्षाका कारण लुम्बिनी र चितवनबीचको खेल रद्द, दुवै टोलीलाई एक–एक अंक
काठमाडौं, १४ कात्तिक
तेस्रो संस्करणको नेपाल प्रिमियर लिग (एनपीएल) अन्तर्गत शनिबार हुने तय भएको लुम्बिनी लायन्स र चितवन राइनोजबीचको खेल वर्षाका कारण रद्द भएको छ। खेल सञ्चालन हुन नसकेपछि दुवै टोलीले एक–एक अंक बाँडेका छन्।
कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा लगातारको वर्षाका कारण खेल सञ्चालन गर्न नसकिएपछि खेल रद्द गरिएको हो।
नेपाल क्रिकेट संघ (क्यान) का सचिव पारस खड्काका अनुसार बिहीबार रातिदेखि परेको अविरल वर्षाले मैदान पूर्ण रूपमा भिजेको थियो। मैदान खेल सञ्चालन गर्न योग्य नभएपछि पूर्वनिर्धारित खेल रद्द गर्ने निर्णय गरिएको उनले जानकारी दिए।
यसैबीच, शनिबारको दोस्रो खेलमा विराटनगर किङ्स र सुदूरपश्चिम रोयल्सबीच प्रतिस्पर्धा हुने तालिका रहेको छ। उक्त खेल अपराह्न ५ बजेदेखि सुरु हुने क्यानले जनाएको छ।
तर, निरन्तर वर्षा भइरहेकाले दोस्रो खेलसमेत प्रभावित हुने सम्भावना देखिएको छ। वर्षा नरोकिए निर्धारित समयमा खेल सञ्चालन गर्न चुनौती हुने देखिन्छ।
यो समाचार पढेर तपाईंलाई कस्तो अनुभूति भयो ?
